Söngurinn eflir innri gleði 

Nýtt 5 vikna söngnámskeið hefst eftir miðjan mars Kennsla fer fram í Litla Skerjafirði, 102 Reykjavík.

Tækifæri fyrir söngvara sem vilja halda sér við, kórsöngvara til að læra að beita röddinni rétt og aðra sem eru lagvísir og langar að læra eða vilja efla styrk og sjálfstraust þar sem söngurinn er svo miklu meira en söngur.

Ég hef góða reynslu af kennslu allt frá byrjendum til 8. stigs nemendum á fjölbreyttum aldri.

Um er að ræða einkakennslu í söng og er hver tími í 40 min.

Tímarnir 5 eru teknir á 5-7 vikum. Verð er 65.000 kr.

Eftir námskeiðið er hægt að sækja framhaldsnámskeið.

Sendu mér póst með smá upplýsingum um þig á listamannaspjall@gmail.com

Viltu vera viss? Vertu velkomin í stakan tíma á 13.000

Hlakka til að sjá þig

Hólmfríður Jóhannesdóttir söngkona og söngkennari

Kennsla fer fram í góðu 22. fm rými í Litla Skerjafirði, 102 Reykjavík.

Aðeins um tónlistarferilinn 🙂

Hólmfríður Jóhannesdóttir byrjaði ung í Söngskólanum í Reykjavík og var tónlistin líf hennar og yndi. Á sama tíma var hún í Menntaskólanum í Hamrahlíð en fljótlega kom í ljós að tónlistin var mikilvægari. Árin í MH voru skemmtileg og félagsskapurinn góður en þau urðu þó ekki mörg og eftir 8. stigs próf frá Söngskólanum í Reykjavík og útskriftartónleika í Íslensku óperunni hélt Hólmfríður til Vínar. Árin í Söngskólanum voru einfaldlega yndisleg og þegar horft er til baka voru þau líklega bestu árin í tónlistarnámi. Til stóð að Hólmfríður færi með góðri söng vinkonu til Vínar og ætluðu þær að leigja saman íbúð, en sú hætti við á síðustu stundu og fór Hólmfríður því ein út 24 ára. Árin í Vín urðu samtals 8 á tveimur tímabilum. Á fyrra tímabilinu lauk Hólmfríður einsöngvaraprófi frá Konservatorium í Vín og 5. stigi í píanóleik. Eftir einhver ár í Vín hélt Hólmfríður til Ítalíu í söngnám og ítölskunám. Fyrst í Mílanó og seinna í Siena. Ítalía var kærkomin breyting. 

Árið 2002 lauk Hólmfríður kennaranámi frá Konunglega tónlistarháskólanum í Bretlandi og var um tíma söngkennari í Söngskólanum í Reykjavík. 

Enn og aftur var haldið til Vínar og nú með ungum syni og var Hólmfríður þá starfandi í Austurríki og í Þýskalandi sem óperusöngkona á tæplega tveggja ára tímabili. Þetta byrjaði þó allt með tónleikum þar sem hún fékk starf hjá tónleika fyrirtæki sem skipulagði tónleika víðsvegar um Vín og söng Hólmfríður 2-3 tónleika á viku í einhverja mánuði áður en farið var að ferðast með óperunni. Til gamans má geta að Hólmfríður söng slétt 100 sýningar sem Hans úr óperunni Hans og Gréta eftir Humperdinck. Ferðalögin voru krefjandi og skemmtileg og félagsskapurinn oftast frábær og að fá tækifæri til að syngja svona reglulega var ekki sjálfsagt.  

Aftur heim. 

Hólmfríður fór að læra dáleiðslu hjá þekktustu dáleiðurum Bandaríkjanna og fljótlega eftir að hún kláraði grunnnám í meðferðardáleiðslu stofnaði hún Andlega Setrið og hefur starfað þar frá 2012 til dagsins í dag.  Á þessum árum hefur Hólmfríður haldið sjálfstyrkingarnámskeið, söngnámskeið og gefið út tvær hljómplötur. Nú síðast 2022, hljómdiskinn Hjarta þitt ásamt Kjartani Valdemarssyni píanóleikara og hljómsveit. 

Hólmfríður hefur haldið fjölda einsöngstónleika. Þeir síðustu voru í apríl 2025 ásamt Ástríði Öldu Sigurðardóttur píanóleikara þar sem flutt voru þekkt ljóð eftir Schubert og Brahms og í mars 2026 í Hannesarholti ásamt Ástríði Öldu með Sibelius og Atla Heimi á efnisskrá.